របបអាហារជារឿងសំខាន់បំផុតដើម្បីឲ្យមានសុខភាពល្អ តែមនុស្សភាគច្រើននៅតែមិនសូវខ្វល់ ជាហេតុនាំឲ្យកើតជំងឺឈឺនេះឈឺនោះមិនចេះអស់ បើទោះវ័យក្មេងក៏ដោយ។ ការញ៉ាំប្រៃ អាហារសម្បូរជាតិខ្លាញ់អាក្រក់ និងបែងចែកទំហំរបបអាហារមិនត្រឹមត្រូវ សុទ្ធតែនាំជំងឺមកពេញខ្លួន មានទាំងជំងឺកាច និងជំងឺស្លូត តែរ៉ាំរ៉ៃ។ អត្ថបទខាងក្រោមនេះ នឹងប្រាប់ពីផលប៉ះពាល់ និងរបបអាហារបែបណាដើម្បីឲ្យសុខភាពកាន់តែល្អ៖
១. បែងចែកទំហំរបបអាហារឲ្យបានត្រឹមត្រូវ ៖ ពាក់កណ្ដាលនៃចានអាហារ ត្រូវមានបន្លែ និងផ្លែឈើ ពណ៌បៃតង ទឹកក្រូច ខៀវ/ស្វាយ និងលឿង។ សារធាតុចិញ្ចឹម ជាតិកាកសរសៃ និងសមាសធាតុផ្សេងៗទៀតក្នុងបន្លែផ្លែឈើទាំងនេះ អាចជួយការពារប្រឆាំងប្រភេទជំងឺមហារីកជាក់លាក់ណាមួយ និងជំងឺផ្សេងៗទៀត។
ពាក់កណ្ដាលចានផ្សេងទៀតចែកជា ២ ផ្នែក៖ មួយផ្នែកសម្រាប់ប្រូតេអ៊ីនដែលគ្មានខ្លាញ់ និងផ្នែកមួយទៀតគឺគ្រាប់ធញ្ញជាតិ។ ប្រូតេអ៊ីន ដូចជា សាច់ត្រី សាច់មាន់ សាច់ និងស៊ុត ជួយរក្សាការរំលាយអាហារ បង្កើនថាមពល និងរក្សាកម្រិតតុល្យភាពជាតិស្កររបស់អ្នករាល់ថ្ងៃ។ គ្រាប់ធញ្ញជាតិ ដូចជា ស្រូវសាឡី អង្ករសម្រូប ពោត សម្បូរដោយជាតិកាកសរសៃ វីតាមីន B សារធាតុប្រឆាំងអុកស៊ីតកម្ម ជាតិដែក ស័ង្កសី ទង់ដែង និងម៉ាញ៉េស្យូម ដែលជួយកាត់បន្ថយហានិភ័យជំងឺបេះដូង ទឹកនោមផ្អែមប្រភេទទី២ និងទម្រង់ខ្លះៗនៃជំងឺមហារីក។
២. ញ៉ាំជាតិសូដ្យូម (ជាតិប្រៃ) តិច និងជាតិប៉ូតាស្យូមឲ្យបានច្រើនកម្រិតជាតិសូដ្យូម (ជាតិប្រៃ) លើស អាចធ្វើឲ្យមានជំងឺ៖-លើសសម្ពាធឈាម , ដាច់សរសៃឈាមខួរក្បាល , គាំងបេះដូង ,ពុកឆ្អឹង ,មហារីកក្រពះ ,រីកសាច់ដុំបេះដូង និង ,ឈឺក្បាល។
អាជ្ញាធរស្បៀងអាហារ និងថ្នាំអន្តរជាតិ ណែនាំថា មនុស្សម្នាក់មិនគួរញ៉ាំជាតិសូដ្យូមឲ្យលើសពី ២.៣០០ មិល្លីក្រាមក្នុងមួយថ្ងៃ ហើយថាក្រុមមនុស្សផ្សេងទៀត អាចញ៉ាំជាតិសូដ្យូមបានតែ ១.៥០០ មិល្លីក្រាមប៉ុណ្ណោះក្នុងមួយថ្ងៃ។
សូមកាត់បន្ថយបរិមាណប្រើប្រាស់ជាតិសូដ្យូម និងញ៉ាំជាតិប៉ូតាស្យូមក្នុងរបបអាហារឲ្យបានច្រើនដែលជួយឲ្យមានតុល្យភាពសូដ្យូម។ ប្រភពមួយចំនួនដែលសម្បូរជាតិប៉ូតាស្យូម រួមមាន ចេក ដំឡូងបារាំង ផ្លែព្រូន ក្រូច សណ្ដែកសៀង និងផ្លែប៉េងប៉ោះ។
ការទទួលទានរបបអាហារសម្បូរជាតិខ្លាញ់អាក្រក់ អាចបង្កឲ្យកម្រិតជាតិខ្លាញ់ក្នុងសរសៃឈាមកើនឡើងខ្ពស់ ផ្ដល់គ្រោះថ្នាក់ដល់សុខភាព។ វាចូលរួមក្នុងការបង្កើនខ្លាញ់ “អាក្រក់” LDL និងបញ្ចុះខ្លាញ់ល្អ HDL។ ខ្លាញ់នេះភាគច្រើន ត្រូវបានរកឃើញក្នុងផលិតផលឧស្សាហកម្មនំដុត អាហារសម្រន់ អាហារចៀន ក្រែម និងម៉ាហ្គារីន (margarine)។ គួរជំនួសមកវិញ ដោយញ៉ាំបន្លែ ផ្លែឈើឲ្យបានច្រើនក្នុងរបបអាហារ។ កាត់បន្ថយញ៉ាំនំស្រួយ នំខេក និងនំបុ័ងគ្រប់ប្រភេទ និងប្រើប្រេងបន្លែ ពេលចម្អិនអាហារនៅផ្ទះ។
No comments:
Post a Comment